poezio.net - Poem

verkinto [voknomo]	titolo	lingvo	identiga kodo	lasta modifo	aspekto
Kálmán Kalocsay	La juna princo	Esperanto	Arg-1701-844	2013-02-26 23:23 Manfred	nur tiun forigu
Rabindranath Tagor	* Shubhokkan	bengala	Arg-1699-844	2013-02-26 23:16 Manfred	nur tiun aldonu
Rabindranath Tagor	The young prince	Angla	Arg-1700-844	2013-02-26 23:27 Manfred	nur tiun aldonu

Rabindranath Tagor,
La juna princo

tradukita de Kálmán Kalocsay

Ho patrin', la juna princo iros preter ni solene.

Kiel povu mi atenti pri laboro ĉi matene?

Montru, ke mi harojn miajn kiel ligu, kiel plektu,

Ho patrino, diru al mi, kiun veston mi elektu?

Vi rigardas mire, panjo? Scias mi, ke li ne sendos

Eĉ rigardon al fenestro, kie je li mi atendos.

Post momento li forpasos, iros vojon senrevenan,

Nur la flut' el malproksimo sendos al mi ĝemon svenan.

Sed la juna princo iros preter nia dom' solene,

Tial prenos mi la veston plej ornaman ĉi matene.

Ho patrin', la juna princo iris preter ni kun brilo.

Leviĝanta sumo brilis de sur lia veturilo.

Kaj vualon mi forŝovis, ŝire mi de l` kol' malligis

Ruben-ĉenon mian, kaj sur lian vojon ĝin faligis.

Vi rigardas mire, panjo? Scias mi: li ĝin ne levis,

Restis sanga gut' sur vojo, kie ĝi sub rado krevis.

Kaj neniu ja konjektas, kaj neniu ja eksciu,

Kio estis la donaco, kaj de kiu, kaj por kiu.

Sed la juna princo iris preter nia dom' ĉi fojon,

Kaj juvelon de la brusto ĵetis mi sur lian vojon.

Traduko de la bengala poemo "Shubhokkan"
de Rabindranath Tagor (*1861-05-07 -
†1941-08-07) en Esperanton de
Kálmán Kalocsay (Kalmano Kaloĉajo,
*1911 - †1976).

Pri la tradukinto vidu la vikipediejon
http://eo.wikipedia.org/wiki/Kálmán_Kalocsay.

Rabindranath Tagor,La juna princo

Rabindranath Tagor,
La juna princo