| eksporti for presado: vertikala formato (PDF) kverformato (PDF) | montru ĉiujn eksport-formatojn |
| verkinto [voknomo] | titolo | lingvo | publikigo | identiga kodo | lasta modifo | aspekto |
|---|---|---|---|---|---|---|
| Stanislaw Schulhof | * Kanto pri espero | Esperanto | 1911-07-19 | Arg-2170-1076 | 2014-07-04 11:29 Manfred | nur tiun forigu |
Stanislaw Schulhof, |
| Dediĉita al la III. Bohema Kongreso Esperantista |
| Ĉu vi aŭdis jam pri la evangelio, |
| kiu en form' de juna, verda stelo |
| brilas hele al homaro sur ĉielo? |
| Ĉu vi aŭdis jam pri unu familio, |
| kiu nun formiĝas gaje el homaro |
| malgraŭ landaj limoj, malgraŭ vasta maro? |
| Ho, vi certe aŭdis, sed vi sen konfido |
| ekrigardas al ĉielo, kie Dio |
| reaperas al ni verda en radio. |
| Al la tero celas via laca vido |
| kaj la strangajn aperaĵojn en la nuboj |
| vi renkontas nune nur kun rid' kaj duboj. |
| Kiu vin kondamnus, teraj kreitaĵoj, |
| Humo estas via propra baz' kaj sfero, |
| ĉiutagan panon donas al vi tero. |
| ĝi ja estas font' de l' viv' kaj ĉiuj aĵoj, |
| dume la ĉiel' vin ofte, ofte trompis |
| kaj evangeliojn siajn krude rompis. |
| Dio mem laŭ Sankta Skribo, foje venis |
| sur la teron, ĉarma, granda kun devizo, |
| ke sur tero iĝu nova paradizo, |
| sed sur Kalvario morto lin ekprenis |
| kaj je lia nomo kaj pro lia amo |
| plena estis poste mond' je larm' kaj flamo. |
| Preskaŭ du miljarojn poste sur Sekvano |
| ekaperis ree Dio al homaro, |
| nova Dio, ankaŭ granda kun fanfaro, |
| kun la homaj rajtoj en la unu mano, |
| sed en dua li alportis malesperon - |
| kaj milope kovris tomboj francan teron. |
| Tamen sen espero kia estus vivo? |
| Eĉ se nin forlasus niaj belaj revoj, |
| eĉ se nin ekridas, kiel maraj mevoj, |
| kaj en rub' disfalas nia perspektivo, |
| vivo sen Espero - estas sen risorto, |
| senenhava vivo, animala sorto. |
| Tial brilu al ni steloj sur ĉielo! |
| Brilu, brilu, eĉ se via ĉarma lumo |
| estas vana, sensubstanca nur parfumo, |
| kaj ne atingebla dezirata celo! |
| Vivo nia estus sur la ter' infero, |
| se ne ĝin dolĉigus iam la Espero. |
| Verkinto de tiu ĉi Esperanta poemo estas Stanislaw Schulhof (*1864-11-12 - †1919-08-18), publikigita 1911-07-19. Tiu ĉi poemo troviĝas en http://anno.onb.ac.at/cgi-content/a no-plus?aid=e0k&datum=1911&page=110&size=51. Pri la verkinto vidu la retejon http://eo.wikipedia.org/wiki/Stanislav_Schulhof. Pri la poezia verko de S. Schulhof legu ankaŭ: http://www.tekstoj.nl/lm/lm22-2/bibliografio.html. |